Almennir skilmálar Noona

Skilmálar þessir gilda um hvers konar viðskipti milli Noona Iceland ehf., kt. 460624-0610, Ármúla 25, 108 Reykjavík (hér eftir „Noona“, „félagið“ eða „við“) og viðskiptavinar vegna kaupa og/eða notkunar viðskiptavina og notenda á þeirra vegum á þeirri þjónustu sem félagið býður upp á hverju sinni („þjónusta Noona“ eða „þjónustan“).

Með „viðskiptavini“ er átt við þann aðila sem gengur frá pöntun á aðgangi að hugbúnaðarlausnum Noona („lausnir Noona“). Sé um lögaðila að ræða skal hið skráða fyrirtæki teljast viðskiptavinur félagsins, nema samið sé um annað.

Viðskiptavinir geta boðið starfsmönnum, samstarfmönnum og/eða verktökum aðgang að tilteknum lausnum Noona og er í skilmálum þessum vísað til slíkra aðila sem „notenda“. Viðskiptavinir bera ábyrgð á notkun notenda lausnanna gagnvart félaginu.

Skilmálar þessir, ásamt eftir atvikum sérskilmálum, þjónustusamningi, tilboði félagsins um þjónustu og gildandi verðskrá Noona fela að jafnaði í sér heildarsamning milli Noona og viðskiptavinar um viðkomandi þjónustu.

Samningur telst kominn á milli félagsins og viðskiptavinar þegar aðilar hafa skrifað undir þjónustusamning, viðskiptavinur samþykkir sérskilmála eða tilboð félagsins um þjónustu innan gildistíma slíks tilboðs, eða þegar viðskiptavinur eða notandi á hans vegum byrjar að nýta þjónustu Noona. Stangist ákvæði skilmála þessara á við ákvæði sem finna má í sérskilmálum, þjónustusamningi eða samþykktu tilboði félagsins skulu ákvæði þeirra síðarnefndu ganga framar þessum skilmálum.

Nánari upplýsingar um einstaka lausnir Noona má nálgast í sértækum skilmálum um viðeigandi þjónustu á www.noona.is.

1. Leyfi til notkunar á lausnum Noona

Viðskiptavinum og notendum er veitt tímabundið, almennt (e. non exclusive), afturkallanlegt og óframseljanlegt leyfi til að nota þjónustu Noona, eftir atvikum gegn greiðslu umsaminna gjalda.

Lausnir Noona innihalda mismunandi þjónustuþætti en þeir þjónustuþættir sem í boði eru hverju sinni fyrir viðskiptavin/notanda fara eftir áskrift viðskiptavinar hverju sinni. Óski viðskiptavinur eftir þjónustu sem ekki fellur undir áskrift hans, skal hann greiða viðbótargjald fyrir slíka þjónustu samkvæmt verðskrá Noona eins og hún er á hverju tíma eða þeim verðskilmálum sem Noona setur.

Framboð þjónustuþátta er alfarið háð mati og ákvörðun Noona. Noona getur því einhliða breytt, bætt við eða hætt að bjóða upp á tilteknar lausnir eða þjónustuþætti án sérstakrar ábyrgðar gagnvart viðskiptavini/notanda. Noona mun þó almennt reyna að tilkynna viðskiptavinum/notendum um slíkar breytingar með a.m.k. 30 daga fyrirvara, með tölvupósti eða tilkynningu á svæði viðskiptavinar/notanda í lausnum Noona.

2. Búnaður

Við kaup á aðgangi að tilteknum lausnum Noona fær viðskiptavinur búnað að láni frá Noona, svo sem spjaldtölvur, eldhúsprentara og peningaskúffur, allt eftir því sem við á hverju sinni („búnaður“). Sá búnaður sem Noona kann að afhenda viðskiptavini er einungis ætlaður honum sjálfum. Viðskiptavini er óheimilt að leigja afhentan búnað, selja eða láta af hendi með öðrum hætti.

Allt eignarhald á búnaði sem viðskiptavinur fær frá Noona tilheyrir Noona, eða leyfisveitendum Noona, skilyrðislaust. Skal viðskiptavinur ábyrgjast að búnaðurinn glatist ekki eða skemmist. Skal viðskiptavinur bæta Noona hvers konar tjón sem verður á búnaðinum sem rekja má til háttsemi viðskiptavinar, viðskiptavina hans eða annarra aðila á hans vegum.

Komi upp bilanir á búnaðinum skal viðskiptavinur senda hann tafarlaust til skoðunar, og eftir atvikum viðgerðar hjá Noona. Noona ber kostnaðinn af viðgerðum nema bilanir og/eða skemmdir megi rekja til athafna eða háttsemi sem viðskiptavinur ber ábyrgð á.

Við samningslok milli viðskiptavinar og Noona af sama hvaða ástæðu er ber viðskiptavini að skila öllum búnaði tafarlaust til Noona og eigi síðar en innan viku frá samningslokum. Sé búnaði ekki skilað áskilur Noona sér rétt til að krefja viðskiptavin um greiðslu á kostnaðarverði nýs samskonar búnaðar.

3. Hugverkaréttindi

Hugverkaréttur að hugbúnaði og öðrum hugverkaréttindum sem tengjast lausnum Noona tilheyrir Noona eða, eftir atvikum, leyfisveitendum Noona. Noona, eða eftir atvikum leyfisveitendur félagsins, eiga þannig allan hugverkarétt, þ.m.t. höfundarrétt, vörumerkjarétt, hönnunarrétt, einkaleyfisrétt og eignarétt að viðskiptaleyndarmálum og sérþekkingu, sem tengjast lausnum Noona. Slíkt hið sama gildir um allar þær viðbætur og/eða breytingar sem kunna að vera gerðar á lausnum Noona. Á grundvelli skilmála þessara á sér þannig ekki stað neitt framsal á hugverkarétti eða annars konar eignarrétti Noona eða leyfisveitenda félagsins til viðskiptavina eða notenda.

Allt það sem fram kemur á vefsíðum Noona, og allur sá hugbúnaður sem þar liggur að baki, þar með talið útlitshönnun, ljósmyndir, texti, grafík og annað því líkt, fellur einnig undir eignarrétt Noona, eða eftir atvikum, leyfisveitenda félagsins.

Öll dreifing, endurútgáfa, eftirlíking eða rafræn afritun af innihaldi vefsíðna félagsins eða hugbúnaðar lausna Noona, að hluta eða í heild, er með öllu óheimil nema með skriflegu samþykki Noona.

4. Verðskrá, reikningar og greiðslur

Gjöld fyrir viðkomandi þjónustu Noona eru að finna í verðskrá Noona á heimasíðu Noona, www.noona.is. Áskriftir að lausnum Noona eru gjaldfærðar sem mánaðargjald, nema annað sé sérstaklega tekið fram í verðskrá Noona og/eða í samningi við viðskiptavin. Í sértækum skilmálum og/eða verðskrá eru einnig að finna lýsingar á innifaldri notkun viðkomandi þjónustu. Noona áskilur sér rétt til að breyta verðskrám sínum, en hvers kyns breytingar skulu tilkynntar viðskiptavini með a.m.k. 30 daga fyrirvara með tölvupósti eða tilkynningu á svæði viðskiptavinar í lausnum Noona.

Viðskiptavinir skulu vera í reikningsviðskiptum nema samið sé um annað greiðslufyrirkomulag skriflega.

5. Reikningar og greiðslur

Viðskiptavinur sem notar lausnir Noona skráir kennitölu og upplýsingar um þann aðila sem hyggst greiða fyrir þjónustuna.

Hver mánaðarmót, sé um áskriftarþjónustu að ræða, eftir atvikum eftir að prufutímabil er liðið, stofnast krafa í heimabanka viðkomandi viðskiptavinar. Sé um að ræða aðgang að lausnum Noona í stök skipti stofnast krafa í heimabanka viðkomandi viðskiptavinar í upphafi næsta mánaðar eftir lok þjónustu Noona nema annað hafi verið tekið fram skriflega af Noona. Noona áskilur sér rétt til að notast við annað greiðslufyrirkomulag svo sem boðgreiðslur.

Gjalddagi reikninga er 1. hvers mánaðar, og eindagi 20. hvers mánaðar. Reikningur birtist í rafrænum skjölum í heimabanka viðskiptavinar.

Sé reikningur ekki greiddur á eindaga skal viðskiptavinur greiða dráttarvexti, eins og þeir eru ákveðnir skv. 1. mgr. 6. gr. laga um vexti og verðtryggingu nr. 38/2001, frá og með gjalddaga þar til reikningur er greiddur. Ágreiningur um fjárhæð reiknings heimilar viðskiptavini ekki að hafna greiðslu á þeim hluta sem ekki er umdeildur.

Athugasemdir skulu gerðar við útgefna reikninga án tafar og eigi síðar en á eindaga, ella telst reikningur samþykktur.

Sé krafan ekki greidd 15 dögum eftir eindaga áskiljum við okkur rétt til þess að loka aðgangi viðskiptavinar og allra þeirra notenda sem hann greiðir fyrir að lausnum Noona, og grípa til annarra mögulegra innheimtuúrræða, þar til að greiðsla berst.

6. Ábyrgð viðskiptavina og notenda

Viðskiptavinir og notendur skuldbinda sig til að nota þjónustu Noona í samræmi við skilmála þessa, leiðbeiningar Noona og gildandi lög og reglur. Viðskiptavinir og notendur ábyrgjast að þeir muni ekki nota lausnir Noona í sviksamlegum eða ólögmætum tilgangi eða setja efni eða gögn inn á lausnirnar sem samræmast ekki lögum og almennu siðferði.

Notendur bera ábyrgð á öllum þeim aðgerðum sem þeir framkvæma í lausnum Noona sem og því efni sem þeir setja inn í lausnirnar. Viðskiptavinur ber sömuleiðis ábyrgð á öllum þeim aðgerðum sem notendur á hans vegum framkvæma í lausnum Noona og því efni sem þeir setja inn í lausnirnar.

Viðskiptavinir/notendur bera enn fremur ábyrgð á að fara eftir viðeigandi lögum og reglum á sviði neytendalöggjafar gagnvart sínum viðskiptavinum, svo sem að tryggja að viðskiptavinum séu veittar fullnægjandi upplýsingar svo sem varðandi verð, skrópgjöld og önnur gjöld sem viðskiptavinur kann að þurfa að greiða til viðskiptavinar.

Viðskiptavinir/notendur skulu eingöngu nota lausnir Noona fyrir innri rekstur og er óheimilt að nýta þær í þágu þriðja aðila, nema aðilar hafi sérstaklega samið um annað.

Notendum er óheimilt að falsa, brjóta, skemma, trufla eða með einhverjum hætti hafa áhrif á öryggiseiginleika eða aðra eiginleika lausna Noona.

Viðskiptavini er óheimilt að framselja réttindi og skyldur samkvæmt skilmálum þessum nema að fengnu skriflegu samþykki Noona.

7. Lokun aðgangs

Noona hefur heimild til þess að grípa til allra hugsanlegra aðgerða sem teljast nauðsynlegar vegna brota viðskiptavina og/eða notenda gegn skilmálum þessum og/eða gildandi lögum og reglum. Noona hefur því m.a. heimild til að loka aðgangi viðskiptavina og/eða notenda að þjónustu Noona í heild eða að hluta og tímabundið eða ótímabundið.

Notendum lausna Noona er með öllu óheimilt að nýta aðgang sinn í öðrum viðskiptalegum tilgangi en þeim er hefur verið samþykktur af félaginu.

Noona áskilur sér rétt til þess að rjúfa þjónustu Noona tímabundið vegna uppfærslna og/eða ef þörf krefur vegna nauðsynlegs viðhalds. Noona skal eftir því sem unnt er framkvæma slíkar aðgerðir á þeim tíma sem hefur minnst áhrif á þjónustuna. Noona skal tilkynna notendum um fyrirhugaða viðhaldsaðgerð með hæfilegum fyrirvara ef hún hefur meiriháttar áhrif á aðgengi að þjónustunni.

8. Réttindi og skyldur Noona

Noona skal tryggja gæði og virkni þjónustu Noona, og aðgengi viðskiptavina og notenda að henni, eftir því sem við á og eftir því sem frekast er unnt m.t.t. aðstæðna hverju sinni. Noona ber ábyrgð á því að þjónusta Noona brjóti ekki gegn lögum, hugverkaréttindum eða samningum við þriðja aðila.

Noona er heimilt að framselja réttindi og skyldur samkvæmt skilmálum þessum til félags innan sömu samstæðu og Noona. Skal tilkynning þess efnis berast viðskiptavini með skriflegum hætti og a.m.k. 30 daga fyrirvara.

9. Uppsögn á áskrift

Eftir að viðskiptavinur hefur gengist við að kaupa þjónustu Noona stofnast ótímabundinn samningur milli viðskiptavinar og Noona um þjónustuna, nema samið hafi verið sérstaklega um annað milli Noona og viðskiptavinar.

Uppsögn skal miðast við mánaðarmót nema annað sé tekið fram í sérskilmálum um viðkomandi þjónustu.

Engar greiðslur fást endurgreiddar við uppsögn sama af hvaða ástæðu uppsögn er. Við uppsögn falla allar útistandandi kröfur Noona á hendur viðskiptavini í gjalddaga.

Við uppsögn falla niður öll réttindi sem viðskiptavinum og notendum hafa verið veitt á grundvelli skilmála þessara.

Noona geymir upplýsingar frá viðskiptavinum og notendum eftir lokun aðgangs í hæfilegan tíma og í samræmi við ákvæði laga nr. 90/2018 um persónuvernd og vinnslu persónuupplýsinga. Óski viðskiptavinur eftir gögnum úr lausnum Noona eftir samningslok ber honum að tilkynna Noona um slíkt án tafar. Noona getur ekki ábyrgst að gögn viðskiptavinar eða notenda séu tiltæk eftir lok þjónustunnar.

10. Persónuvernd

Til þess að geta veitt viðskiptavinum þá þjónustu sem felst í aðgangi að lausnum Noona er okkur nauðsynlegt að vinna með tilgreindar persónuupplýsingar sem svokallaður vinnsluaðili fyrir hönd viðskiptavina okkar. Um vinnslu þá sem við sinnum fyrir hönd viðskiptavina sem vinnsluaðili gilda vinnsluskilmálar okkar, sem teljast órjúfanlegur hluti af skilmálum þessum, en þá má nálgast á heimasíðu Noona, www.noona.is.

Hvað varðar vinnslu okkar á persónuupplýsingum þar sem félagið kemur fram sem ábyrgðaraðili, svo sem um forsvarsmenn viðskiptavina okkar vísast til persónuverndarstefnu okkar, sem jafnframt telst órjúfanlegur hluti af skilmálum þessum. Þar er m.a. upplýst um hvaða upplýsingar unnið er með, í hvaða tilgangi og hvaða réttindi þeir einstaklingar sem við vinnum með upplýsingar um njóta á grundvelli persónuverndarlaga. Stefnuna má nálgast á heimasíðu Noona, www.noona.is.

Noona áskilur sér rétt til að safna og greina ópersónugreinanlegar tölfræðiupplýsingar um notkun þjónustu Noona í þágu rekstrar og vöruþróunar. Áskilur Noona sér jafnframt rétt til að birta ópersónugreinanlegar og órekjanlegar upplýsingar um framangreint, hvort sem er opinberlega eða í markaðs- og kynningarefni þjónustunnar.

11. Skilaboð Noona til viðskiptavina

Noona áskilur sér rétt til að senda viðskiptavinum og notendum með tölvupósti, eða tilkynningu á aðgangi viðskiptavina og notenda að lausnum Noona, upplýsingar um allar þær nýjungar sem kunna að bætast við þjónustu Noona.

Noona áskilur sér jafnframt rétt til að senda viðskiptavinum og notendum fréttabréf með tölvupósti. Viðskiptavinir og notendur geta þó alltaf afþakkað slíka þjónustu. Með samþykki viðskiptavina og notenda getur Noona jafnframt sent viðskiptavinum og notendum markaðsskilaboð í gegnum SMS.

Öll skilaboð sem notendur lausna Noona fá í gegnum smáforritið eru send af hálfu viðskiptavina Noona sem notendur hafa pantað þjónustu hjá eða eru í annars konar sambandi við. Um slík skilaboð gilda skilmálar viðkomandi þjónustuaðila.

12. Takmörkuð ábyrgð

Noona ber enga ábyrgð á tjóni sem viðskiptavinir, notendur eða aðrir þriðju aðilar kunna að verða fyrir í tengslum við notkun á þjónustu Noona, nema annað leiði af lögum.

Noona undanskilur sig ábyrgð á hvers kyns aðgerðum, þ.m.t. pöntunum og greiðslum, sem framkvæmdar eru í lausnum Noona. Þá ber Noona ekki ábyrgð á því efni og gögnum sem viðskiptavinir og notendur kunna að setja inn í lausnir Noona.

Noona ber enga ábyrgð á háttsemi eða tjóni sem valdið er af þriðju aðilum sem kunna að sinna einstökum þjónustuþáttum í tengslum við lausnir Noona, svo sem færsluhirðum eða öðrum greiðsluþjónustuveitendum.

Þjónusta Noona er veitt í því ástandi og formi sem hún er hverju sinni. Noona getur ekki ábyrgst að allir eiginleikar þjónustu Noona séu virkir í öllum vöfrum og/eða búnaði. Noona getur heldur ekki ábyrgst að lausnir Noona séu villulausar með öllu eða reknar án truflana.

Að því marki sem heimilt er samkvæmt gildandi lögum skal réttur viðskiptavinar/notanda til skaðabóta úr hendi félagsins takmarkast við beint tjón og bótaábyrgð félagsins nær ekki til óbeins eða afleidds tjóns, þ.m.t. rekstrartaps, tapaðra gagna sem leiða kann af notkun á hugbúnaði eða ómöguleika á notkun hugbúnaðar, missis hagnaðar eða viðskiptavildar eða vanefndar viðskiptavinar á samningi við þriðja aðila. Þá er félagið ekki bótaskylt vegna tjóns sem ekki verður rakið til ásetnings eða stórkostlegs gáleysis félagsins eða þeirra starfsmanna sem félagið ber ábyrgð á. Möguleg bótaábyrgð Noona skal aldrei nema hærri fjárhæð en þeim þjónustugjöldum sem viðskiptavinur hefur greitt fyrir notkun á þjónustu Noona á síðastliðnum þremur mánuðum fyrir tjónsatburð og skal bótaábyrgð Noona gagnvart notendum takmarkast við 200.000 kr., að því marki sem slík takmörkun er heimil á grundvelli laga.

Sérstaklega skal tekið fram að Noona ber enga bótaskyldu vegna tilkynninga sem berast seint, eða berast ekki, í gegnum lausnir Noona. Að sama skapi skal Noona ekki bera ábyrgð vegna villu í efni tilkynninga eða upplýsinga sem finna má í lausnum Noona.

13. Breytingar á skilmálum þessum

Noona áskilur sér rétt til að gera breytingar á skilmálum þessum hvenær sem er. Allar stórvægilegar breytingar skulu vera tilkynntar viðskiptavinum og notendum með a.m.k 30 daga fyrirvara með tilkynningu í tölvupósti eða í gegnum svæði viðskiptavinar og notanda í lausnum Noona.

Skal viðskiptavini þá gefinn kostur á að segja upp þjónustu Noona. Með því að halda áfram notkun þjónustu Noona eftir að breytingarnar taka gildi telst viðskiptavinur og/eða notandi hafa samþykkt breytingarnar.

14. Varnarþing

Skilmálar þessir lúta íslenskum lögum. Ágreiningsmál sem rekja má til skilmálanna skulu rekin fyrir Héraðsdómi Reykjavíkur.

Skilmálar þessi tóku gildi 26. maí 2025 og var síðast breytt 26. maí 2025.